احدث اعمالنا 
موقع الزمالة المصرية و موقع نتائج وزارة الصحة

اهلا وسهلا بكم في شبكة امتيازنا ,, دليلك خلال سنة الامتياز وحتي نهاية التكليف

http://emtyazna.com/images/stories/flexicontent/l_10329186_1436154566632170_5192339911517239239_n-1.jpg

من الحالات اللي الواحد بيتمني انه ميشفهاش حالات الحساسية من الادوية اول مرة تحصل معاي كان السنة اللي فاتت كان طفل عمره سنتين تقريبا كان جاي بكحة وسخونة خفيفة بداية التهاب شعبي فقلت ابدا بحقنة سريعة علشان متقلبش بالتهاب رئوي شديد فكتبتله علي سيفاكسون ١جم علي جرعتين نصف جرام كل ٢٤ ساعة وشراب بروفين للسخونة ولبوسة دولفين عند اللازوم وشراب كحة وكان عندي عينة سيفكسيم شراب اديتها لمامته تكمل بيها بعد الحقنة المهم نزلت تصرف العلاج من الصيدلية والصيدلي هو اللي اداه الحقنة ومفيش عشر دقايق ولقيت الام جاية بتصرخ الواد مات انا قمت مرعوب وخدت الواد منها وحطيته علي السرير لقيتة وشه ازرق وبيتشنج فاول حاجة جت في دماغي انها تشنجات سخونة ,روحت قلعته البنطلون وحطيت تحت الحنفية علشان اعمله كمادات وبعت اجيب حقنة نيوريل واديته ١سم عضل , وروحت واخده وطالع بيه علي جامعة اسيوط وطول الطريق وانا بتخيل ان الطفل ده لو مات مش هاقدر اكمل في شغلانة الطب ده تاني

وطول الطريق حاطط ايدي علي النبض وبتابع النفس بتاعه لغاية ما وصلنا مستشفي الاطفال في الجامعة ودخلت علي الاستقبال اول ماوصلت كان فيه نائبة الاطفال قلتلها ان اخد حقنة سفترايكسون وحصله cysnosis وحساسية شديدة , وطبعا حكاية الحساسية ده مجتش في دماغي غير في الطريق ,والا كنت اديتله فورتي كورتين وضد الحساسية في العيادة المهم ركبوله كانيولا وادوله افيل وفورتي كورتين ومحلول ريهيدران وجلسة فاركولين وبعد نصف ساعة اتحسن شوية ,وجه خال العيل يتخانق معاي انا هشتكيك في النقابة ,وبصراحة مردتش عليه لاني كنت متخيل نفسي مكانه كنت هبقي متضايق جدا ,المهم الدكتورة قعدت تفهم فيه ان الحقنة مش بنعملها اختبار حساسية المهم برده كانت ليلة ما يعلم بيها الا ربنا وقعدت اسبوع بعدها عندي اكتئاب ومنزلتش العيادة فترة وكنت كل يوم اتصل بمامته اطمن عليه لغاية ما الحمد لله طلع من المستشفي ,وفضلت سنة كاملة مكتبش حقن السفترايكسون الا للضرورة القصوي الغريبة بقي ان خال الطفل اللي اتخانق معاي عنده ولدين كل ما يتعبوا يجوا يكشفوا عندي والاغرب ان الطفل اللي عنده حساسية مامته جبتهولي تاني من شهر تقريبا بعد مابقي حوالي عمره ٣ سنوات وجاي برده بالتهاب شعبي مردتش طبعا اديله حقن اديته هاي بيوتك شراب بس للاسف ما تحسنش فاديته الجيل الرابع من السفالسبورين الماكسبيم ومعاه فورتي كورتين وقعدته جنبي نصف ساعة لحسن تحصله حساسية تاني والحمد لله اتم الله له الشفاء

وفي النهاية بدعي ربنا اني ربنا يبعد عني وعنكم حالات حساسية الحقن

تعليقات الزوار
سيب اي كومينت الله يكرمك ,, حلو او وحش مش مشكلة ,, المهم حسسنا ان في بني ادمين بتعدي من هنا :D
اعجبني

HTML 5 شبكة امتيازنا ,, فكرة الموقع ببساطة هي اننا ننور الفترة الضلمة في حياة كل واحد فينا اللي هي فترة الامتياز ,, فجأة بتلاقي نفسك خلصت الكلية وماعدتش عارف تعمل ايه ؟ تنزل فين ؟ ايه الاجراءات وشغل الحكومة دي ؟ تذاكر منين ؟ تنزل من بيتك ولا تأنتخ ؟ وهتفرق ؟ بعد الامتياز في ايه ؟ من الاخر هنا هتلاقي كل حاجه هتحتاجها من اول ما تظهر نتيجة سنة ساته فتابعنا :).