احدث اعمالنا 
موقع الزمالة المصرية و موقع نتائج وزارة الصحة

اهلا وسهلا بكم في شبكة امتيازنا ,, دليلك خلال سنة الامتياز وحتي نهاية التكليف

ادارة الحسنه شمال سيناء ٢٠١٤

  • الادارة
    ادارة الحسنه شمال سيناء ٢٠١٤
  • المفضلة
    Click to subscribe
  • عدد الزيارات
    3111 زيارات
  • تاريخ اخر تحديث
    الإثنين، 21 أيلول/سبتمبر 2015
  • المحافظة
    شمال سيناء
  • رسالة من صاحب التقرير

    تنبيه من صاحب التقرير

    حاول تبعد عن شمال سيناء

    لان مش هتقدر تنقل من هناك بسهوله

  • المرتب والحوافز
    المرتب 1535
    الحوافز 700 جنيه
  • الاجازات

    العمل 15 يوم شهريا إقامة كاملة و بطبيعة الحال لا توجد نبطشيات
    وراحة 15 يوم

    د حاتم الصواف

    -------------

    الرسمى بتاعك شغل 15 يوم وراحه 15 يوم او بالتحديد 17 يوم شغل
    بس اللى ماشى 15 يوم دا رسمى...وبعدين بتعتمد انت معاك اطباء غيرك ولا لا..
    يعنى انا من فتره كان معايا طبيب زميل كنا بنبدل مع بعض
    ممكن اسبوع ممكن 10 ايام حسب ظروفك وظروفه بترتبوا مع بعض
    اهم حاجه المكان يكون فى حد .

    فى بعض الوحدات بعيد شويه وملهاش مواصلات ثابته
    ودى مش بيروحها حد كتير فى دكاتره بتروح تقعد كام يوم بس
    وتمشى وفى يقعد اسبوع يعنى كل واحد بيظبط اموره بمعرفته
    بس الرسمى انك 15 يوم عمل و15 يوم راحه .

    Dr Mahmoud El-tantawy

  • ظروف المعيشة

    في وحدة الحسنة نفسها جيدة
    لكن باقي وحدات الإدارة سيئة جدا ....
    سيطرة كتائب الجيش على معظم الوحدات واتخاذهم الوحدة كسكن
    المديرية توفر غذاء للعاملين .....كيلو لحمة وفرختين وكيسين مكرونة وكيس رز
    وشاي وسكر ومربى وزبادي و15 بيضة

     د حاتم الصواف

    ----------

    اهم حاجه واللى بيحدد كل التفاصيل دى هو مكان الوحده... الادارة مترامية الاطراف
    وفى وحدات تبعد عن بعض فوق ال50 وال100 كيلو وبدون مواصلات ثابته..
    انا حاليا فى وحدة الحسنه بجوار مبنى الاداره مباشرة ...
    المبنى لسه جديد مجهز من قبل الجيش منذ اقل من عام ...
    نظيف جدا وتشطيب لوكس وتليفزيون ودش وكل حاجه بس دا اللى شفته فى الحسنه
    بس باقى الوحدات او على الاقل اللى شفتهم مش كدا خالص وبعضهم السكن لايصلح للاستخدام الادمى...
    الحسنه بها مطاعم صغيره ومحلات وبقاله وكدا يعنى هتلاقى اكل وشرب
    ودا على العكس من بعض الوحدات الاخرى ممكن مش تلاقى اى محلات...

    اهل البلد معظمهم موظفين زى حالاتك من الوادى زى ما بيسموه يعنى المنصوره والشرقيه وكدا..

    كلهم موظفين فى المصالح الحكوميه والادارات المختلفه وبعض البدو
    بس عددهم قليل وتعاملهم كويس جدا لانهم مختلطين باهل الوادى من زمان .

    Dr Mahmoud El-tantawy

  • مدير الادارة

    مدير الادارة لسه جديد من اول شهر يناير 2015
    وبصراحه راجل عايز يشتغل ويحسن المكان... هو الاهم عنده يكون المكان شغال
    ودكتور موجود والدنيا تمام. وبيقولك مشى الوحده بمعرفتك
    بس المهم عنده المكان شغال وبس .

  • المواصلات

    بعد ما توصل العريش .....
    هتركب من الموقف عربيات ميكروباص بتروح الحسنة أو نخل
    ودول هيخلوك تعدي على وحدتين ....
    وحدة اسمها بغداد ووحدة الحسنة اللي في الإدارة
    باقي الوحدات هتنزل على الطريق
    وتستنى عربية نص نقل أو نقل أو كارو حتى معدية عشان توصل للوحدة
    والأحسن ما تستلمش غير في بغداد أو الحسنة
    ومش هكرر كلامي
    يا بغداد يا الحسنة ...... بس
    العربيات شغالة فقط لحد الساعة 2 الظهر لو وصلت العريش بعد كدة بات واركب الصبح
    ....................
    ممكن من الاسماعيلية تقف على الطريق تركب عربية رايحة الجفجافة دي وحدة تبع الادارة
    وتنزل في الجفجافة تركب عربية نقل أو نص نقل أو كارو حتى تكون رايحة ناحية الحسنة عشان توصل

  • الحالات اللي بنشوفها

    معظم الناس مش بييجي يكشف
    بييجي ياخد منك العلاج اللي ولاد جيرانه عايزينه
    يعني انت في المعظم بقال
    باقي الحالات برد وكحة
    أصعب حاجة الليشمانيا......
    مرض طفيلي عضال تتسبب فيه لسعة ذبابة الرمل علاجه المصل الذي توفره وزارة الصحة
    في وحدات الحسنة وبغداد فقط ولا يمكن شراؤه وغير متوفر غير في وحدتي الحسنة وبغداد
    وخاف على نفسك من اللسعة .........لازم دايما ترش مبيدات
    وتلبس هدوم طويلة وتاخد بالك من نفسك

  • البرايفت

    من بعد الساعة 2 ظهرا الكشف على لحالات ب 5 جنيه
    لكن ستضطر لصرف الدواء من صيدلية الوحدة لعدم وجود صيدليات بالإدارة كاملة
    ولا يوجد من يوفر خدمة طبية غير الوحدة

  • جروب الفيس
  • حاجه اخيرة حابب تقولها

    ماتروحش شمال سينا
    لو رحت يبقى الحسنة .....وحدة الحسنة أو وحدة بغداد
    خاف على نفسك من الليشمانيا
    اوعى تستلم في وحدة تانية غير دول
    الصراف حرامي ومرتشي وعامل فيها خضرة الشريفة
    المواصلات زبالة
    الطريق بين العريش والحسنة بيقفل الساعة أربعة بأمر القوات المسلحة لأجل غير معلوم


    د حاتم الصواف
    قبل ما تروح اى وحده تسأل حد كان فيها دكتور زيك ومتسمعش لاى حد من الموظفين سواء فى المديريه او الاداره انت مش فارق معاه خااااالص الاهم عنده انه يغطى المكان بدكتور وخلاص... فى وحدات صعبه جدا وفى اماكن استحاله المعيشه فيها وفى اماكن ممتازه فى الراحه والاطمئنان وفى اماكن حلوه فى البريفت .. اختار على حسب هواك بس اتأكد من المواصلات وتعامل الناس معاك اولا من دكتور كان هناك قبلك مش من حد غيره.
    Mahmoud El-tantawy
  • تقييم الادارة
    التقييم العام للادارة
    3 votes
  • كتب هذا التقرير

    alsawaf

    د حاتم الصواف

    طبيب تكليف بـ شمال سيناء
    دفعة 2012 .
    جامعة الازهر

     

    tantawy

    Dr Mahmoud El-tantawy

    طبيب تكليف بـ شمال سيناء
    دفعة 2012 .
    جامعة الازهر

  • اعجبني
تعليقات الزوار
سيب اي كومينت الله يكرمك ,, حلو او وحش مش مشكلة ,, المهم حسسنا ان في بني ادمين بتعدي من هنا :D

HTML 5 شبكة امتيازنا ,, فكرة الموقع ببساطة هي اننا ننور الفترة الضلمة في حياة كل واحد فينا اللي هي فترة الامتياز ,, فجأة بتلاقي نفسك خلصت الكلية وماعدتش عارف تعمل ايه ؟ تنزل فين ؟ ايه الاجراءات وشغل الحكومة دي ؟ تذاكر منين ؟ تنزل من بيتك ولا تأنتخ ؟ وهتفرق ؟ بعد الامتياز في ايه ؟ من الاخر هنا هتلاقي كل حاجه هتحتاجها من اول ما تظهر نتيجة سنة ساته فتابعنا :).