احدث اعمالنا 
موقع الزمالة المصرية و موقع نتائج وزارة الصحة

اهلا وسهلا بكم في شبكة امتيازنا ,, دليلك خلال سنة الامتياز وحتي نهاية التكليف

الشرح

 

ألف مليون مبروك على التخرج يا دكتور ..  انت حققت انجاز مهم فى حياتك و عليك ان تفخر بكده , حقيقى فعلا , و نحن - أسرة الموقع - تحب تهنيك على هذا الانجاز و تتمنى لك دوام التوفيق و النجاح فى حياتك دائما ان شاء الله .

و لكن قبل ما تأخذك الحماسة و تعلن للعالم أجمع أنك أصبحت دكتور أد الدنيا , تذكر انك مازال أمامك خطوة أخيرة تخطوها قبل أن تحلق فى سماء الطب بحرية ... الخطوة ديه اسمها سنة الامتياز

في الصفحة دي هنحاول نجاوب علي اسئلة كتير اكيد في بالك ,, فاقراها كويس ,, هتفرق معاك

ايه سنة الامتياز دي ؟

ايه سنة الامتياز ديه ؟

الامتياز أصلها فعل امتاز أى تفرق و تميز , يعنى بالمعنى العملى السنة اللى تفرقك عن كونك طالب فى بيئة تعليمية بحتة فى اعتبار ما كان و عن كونك كونك طبيب متدرب مؤهل و له رخصة مزاولة المهنة , السنة ديه ابتكار غربى معروف عالميا باسم Internship year , و لكن فى السنين الماضية تم تعديلها لتكون ملحقة بسنين النيابة Residency كما تسمى فى أمريكا أو سنوات التأسيس Foundation Years كما فى بريطانيا .. و هناك اتجاه فى مصر للقيام بنفس التعديل و تطبيقه فى المستقبل .

دورك إيه كطبيب امتياز يا فندم ؟

دورك إيه كطبيب امتياز يا فندم ؟

بسيطة إن شاء الله , المفروض أنها الأساس أو القاعدة اللى هتبنى عليها كل حاجة هتتعامها بعد كده فى حياتك العملية , المفروض تتعلم أساسيات و تتدرب على مهارات فى فروع الطب الرئيسية زى أمراض الباطنة ,الأطفال , و الجراحة , و النساء و التوليد , الطوارئ و الاستقبال و أخيرا تخصص أو اتنين تختار تحضرهم برغبتك , كل ده المفروض بيتم على مدار سنة كاملة , بتتقسم على 6 أجزاء أو Shifts ,المفروض كل جزء بيدوم شهرين بتحضر فى القسم التابع للنخصص , و المفروض تلتزم مع كل قسم بمواعيد العمل الرسمية و جدول العمل اللى معمول لسيادتك و المفروض يتعملك تقييم فى نهاية كل shift لمستواك فى الشغل و اد ايه استفدت من shift . دا المفروض

المفروض , المفروض , المفروض ... أنت كررت الكلمة ديه كتير ليه ؟

المفروض , المفروض , المفروض ... أنت كررت الكلمة ديه كتير ليه ؟

عشان أنت فى مصر أم الدنيا .. مفيش حاجة ماشية صح للأسف , على الورق كل حاجة تبان تمام و منظمة بس الواقع مختلف تماما و اسأل اللى أكبر منك .. هتلاقى ماحدش بيسأل فيك أصلا من أول يوم , و مفيش حد فاضيلك يعلمك حاجة إلا من رحم ربى , و هتلاقى إن الحضور و الانصراف مجرد شكليات و حبر على ورق , و هتلاقى نفسك يوم بعد يوم همتك بتفتر و بتكسل تنزل و فى النهاية هتقضى السنة منازل بعد ما عديت عدد البلاط فى البيت و ضربتها بعدد القنوات اللى عالنايل سات بس .. و هتفاجئ فى نهاية السنة أنك كما ولدتك أمك و دخلتك طب مش عارف حاجة و , انك مكلف تعمل بوحدة صحية لوحدك مؤتمن على حياة قرية بأكملها .. وا مصيبتاه !!؟ ماذا أذنبت يداى ؟؟

{/slideraaaas

سنة الامتياز لها 3 محاور أساسية أو اهداف بتتعامل معاها:

التعليم والتخطيط للمستقبل ، الشغل والفلوس ، النواحي الادارية .

بالنسبة للتعليم

قبل ما نبتدي لولا قدر الله طلعت من السنة دي صفر اليدين لن تتأثر حياتك كثيرا وممكن تبقي فلة شمعة منورة وتبقي مجدي يعقوب بعدها كمان ولا يهزك ، ولكن في الاغلب اللي بيبقي مقضيها بلطجة بيفضل طول عمره كده فحاول برضوا تبقي متوازن لأن ال attitude بيأثر عليك فيما بعد الي حد كبير ، الغرض الاساسي اللي بقول الكلمة دي علشان ان تبقي واخد الدنيا بالهداوة مش اكثر ولا اقل مش ان تهمل بالكلية .

 

لازم تبقي عارف ان الطب بالاساس الا في تخصصات قليلة مهنة تؤخذ بالتلقي عن الاستاذ وليس عن الكتاب ونتلقاه في المستشفي مش في المعامل ، يعني انت بلية بتتعلم علي ايد ميكانيكي ، هتتعلم من الكتاب وبس يبقي مهما قريت هتفضل بلية وبلية عبيط كمان ، بس لو اتعلمت من الاستاذ وبس هتبقي حصرت نفسك في علمه وعمرك ما هتتخطاه ويمكن عمرك ما هتفهم اختياراته مبنية علي اى اساس ، يبقي اتعلم في المستشفي بالاساس مش من الكورسات ولا الدورات ولا من الكتب ، الحاجات الباقية دي مكملة انما الاساس انت بتتعلم في الورشة في المستشفي .

 

اذن وعلي ماسبق ، حضور الدورات (قد) يفيد ، لكن لو مش مخطط لنفسك هتطبق اللي اتعلمته ده فين وعلي ايد مين يبقي مالهاش اى تلاتين لازمة ، وابقي عارف ان لو حضرت في كشك النسا وللا في استقبال الجراحة هتتعلم احسن من الف كورس او دورة مهارات اساسية خصوصا المهارات اليدوية ، تتبقي شوية Guidlines او شوية كلام نظرى هو ده اللي ممكن تحضرله الا لو ربنا كرمك بنايب بيفهم وفاضي لك وقليل ماهم يقعد يظبط لك دماغك .

 

التعليم في الامتياز فيه حاجات اساسية فعلا هتبقي خسرت كتير لو السنة خلصت وماتعلمتوش ، ويمكن لا تتاح لك فرصة تعلمه تاني حسب تخصصك ، علي سبيل المثال انا شخصيا كنت بلطجي التنين في الامتياز رغم ان علي اخر السنة كنت تقريبا نايب تخدير جونيور محترم قبل النيابة حتي ، لكن ضيعت بقي التخصصات ، من كام يوم اكتشفت اني بعد خمس سنين خدمة في طب لم احضر ابدا ولادة طبيعة ولا اعرف غير كلام الكتب هم بيعملوا ايه ، وعلي هذا فقس .

 

 

طيب ايه المهارات اللي اتعلمها في سنة الامتياز

مهارات الجراحة الاساسية من غرز بأنواعها وغيارات ووو ، هتفيدك جدا في سنين التكليف وقد تتحول الي اكل عيشك في الوحدة اصلا ولو اخدت تخصص غير جراحي مش هتلاقي تتعلم فيه تاني ولو احتاجت الحاجات دي هتبقي مشكلة لو مش بتعرف تعملها .

 

شغل عيادة النسا والاطفال والباطنة لو لك تكليف ، اساسي جدا جدا جدا .

 

اى حاجة تاني نفففففففففففففففففففففض ، وركز في تخصصك بقي ، الحاجات دي بالمناسبة تتعلمها في شهرين تلاته من السنة بالكتير اوى وتمارسها بقي او تكتبها وتمارس بعدين في الوحدة او في مكان تحتاج له ، بس مشي ايدك في مهارات الجراحة طبعا وشغل الطوارئ علشان ماتموتش عيانين مهم مهم مهم مهم .

 

 

دورات سونا بقي واشعة تفصيلية مش عارف بتاع ايه وعمليات متقدمة وتخصصية جدا ووووو ، لو فاضي والفراغ قاتلك اشطة ، لكن صدقني حتي لو احتجت في تخصصك الكلام ده هيتعاد الف مرة ، وهتكتشف ان في النيابة بيتقال لك احنا لينا تصور تاني خااااااااااالص للكلام ده حسب التخصص والمكان ، بس صدقني بربع جنيه لب افيد كتير من امتياز بيحضر عمليه Abd .Aortic aneurysm وللا cancer larynx .

 

 

بالنسبة للتخطيط للمستقبل

 

، دي بقي أهم حاجة تعملها في الامتياز ، ودي بقي بجد اللي لو السنة خلصت وانت مش عارف تخصص ايه وهتمشي في حياتك ازاى علي الاقل كخطة مبدئية تبقي السنة راحت عليك وهتأثر في بقية حياتك سلبا وبشدة .

 

طبعا حياتك العملية تبدأ بخطوة أساسية جدا وهي اختيار التخصص ، دي أهم خطوة في حياتك ، ده الجواز المهني الكاثوليكي اللي مفيش منه طلاق الا بخسائر رهيبة لو حصل ، خد وقت وكن صريح مع نفسك جدا انت هتستريح في ايه ، لا تدور علي برستيج ولا علي رأى الناس كأولوية ، اولويتك هي اللي انت بتحطها لنفسك وبس ، سواء بقي تخصص فيه فلوس سواء تخصص هيشغلك برة سواء تخصص بيخليك تشتغل حاجة بتحبها ، ايا يكن كن صريح مع نفسك جدا .

 

طيب اختار التخصص ازاي؟

 

حدد دائرة اختياراتك بثلاث اربع تخصصات ، اعرف انت بتحب النظرى وللا الجراحات ، بتحب شغل العيادات وللا العمليات وللا المعامل ، بتحب تشتغل طول الوقت مع اجهزة وكمبيوترات ومش طالبة معاك عيانين ، كل اختيار من دول تندرج تحته مجموعة تخصصات ، حدد اولوياتك كويس .

 

احضر في كل تخصص فترة كويسه ، اقعد مع النواب وشوف بيذاكروا منين وازاى ومدي سهولة التحضير وظروف البرايفت والشغل والسفر برة لو بتفكر ، وطبعا المعادللات والزمالات لو بتفكر في الليلة دي .

 

القصص دي نبقي نتكلم فيها لاحقا بالتفصيل لو الناس طلبت ، انما الهدف الاساسي (في رأيي) في المرحلة دي ان تحدد التخصص اللي هتشتغل فيه .

 

 

طيب بالنسبة لموضوع الزمالات والمعادلات في السنة دي؟

 

نيجي بقي للكلام عن الزمالات والمعادلات اللي الناس بتشتغل فيها في الفترة دي ، تكاد تكون المعادلة الامريكية USMLE هي الحاجة الوحيدة اللي اساسي جدا تشتغل فيها في الامتياز ، اى حاجة تاني ممكن تتأجل ، يمكن كمان لازم تتأجل لغاية ما تحدد التخصص اللي أنت عاوزه لأن كتير من الزمالات بتحتاج قدر من الخبرة العملية ومش هتعرف تعدي الامتحان بسهولة من غيرها .

 

لتلخيص الكلام عن المعادلة لو اى حاجة من الحاجات اللي جاية دي مش متوافرة معاك يبقي افكس لحوار امريكا ده من بابه كده ومتصدعناش

 

* يبقي معاك 100 الف جنيه ميتة ، مش ناوى تعمل بيهم حاجة ( التكلفة معظمها رايح في الجزء التالت والاقامة في امريكا ووو) مش في مصاريف الامتحان نفسه .

 

* تبقي متقبل تماما ان تشتغل باطنة او اطفال بالاساس ، بقية التخصصات مش هتبقي سهلة ومعظم الجراحات مقفولة.

 

حاول لو هتمشي في السكة دي تخلص الجزء الاول في الامتياز ، نفض لاي حاجة تاني في حياتك وركز في الامتحانين لا استلام تكليف ولا نيابات ولا وجع قلب ، اهم حاجة سكورك والامتحانات تخلص في خلال سنة ونص الي اتنين بالكتير اوى ، لو طالت المدة عن كده هيتأثر السكور بتاعك كتير .

 

{/slideraaaas

 

فيه حاجات لما بنفقدها مش بترجع ، وعلامات مش بتعلم في الوش ولا علي الجلد ، بتعلم في الروح والنفس هتفضل تشوفها طول عمرك في اي مراية تبص فيها ، أنت داخل الامتياز زي ما قلت صفحة بيضاء ( علي الاقل في مستقبلك المهني ) ، حاول ماتكتبش غير اللي تفتخر بيه وتبقي راضي عنه لما ترجع تقراه ، حاول ما تفقدش كتير في الرحلة من رصيدك ، خللي من أهدافك ان بعد عشرين سنة ايا كان اللي وصلت له من نجاح او سعة في الرزق بفضل الله ، مايبقاش مصحوب بعار ما أو افعال تخجل منها او لا تتناسب مع مبادئك .

 

ايه لازمة الكلمتين دول بقي وايه محلهم؟

 

بص يابرنجي انت الناس بتقول لك ياضادكتور من ساعة نتيجة ثانوية عامة ما طلعت ، من قبل ماتقلع مريلة المدرسة الثانوي اصلا ، بيقولوهالك من ساعة ما كنت بتروح مدرج الفسيولوجي والاناتومي بالشورت ، اوعي تصدق نفسك ، انت لسه بدرى جدا جدا جدا من الناحية الفنية علشان تبقي دكتور ، ومن الناحية القانونية طبعا مش معاك ترخيص مزاولة مهنة، يعني اى شكل من اشكال التعامل (المستقل دون رقيب ) مع المرضي يعتبر فنيا خطأ وقانونا جريمة والكسب المترتب عليه فيه نظر (شرعا) .

 

عارف كويس طبعا المأساة الاجتماعية بتاع ال200 ج اللي بتقبضهم وانك بقيت اكبر سنتين من أخوك اللي اتخرج من هندسة وبيشتغل وقرب يجيب تمن الشبكة ، ولكن صدقني اللي هتعمله انهاردة هيعلم فيك جااااااااامد ، فلو كنت من بتوع المبادئ وبتحترم نفسك واللي بتعمله فعلا ، اخشوشن شوية وقلل نفقاتك بقدر المستطاع لكن لا تنزلق الي شغل المستوصفات اياها اللي بتتعلم لك كلمتين وتاخد معاك الكتب اياها بتاع الوصفات وتعيش دور الدكتور ، حرااااااااااام عليك .

 

لو عاوز اشتغل ,, اشتغل ايه؟

لو عاوز تشتغل وتجيب فلوس ، مفيش مانع من شغل الصيدليات ، الميديكال ريب ( لو قبلوا فيها حد نضيف يعني ) كمبدأ شغلانة مفيهاش مشكلة ولو ان البعض قد يراها مهينة شويه ، شغل المعامل اشطة ، ان شاء الله تباع في الميكروباز اللي بيروح بيك المستشفي بس المهم لا تتعامل مع علاج المرضي بشكل مباشر .

بالنسبة للشق القانوني

ده من الناحية الفنية بالنسبة بقي للقانون ، اعرف انك فعلا في الاوفسايد ، لا انت خريج ولا انت طالب ، حاجة كده وقف امامها قانون العمل المصرى مزبهلا ومش عارف يوصفك بالظبط وهو ما ينتج عنه مزيج غريب في التعامل هيئات تتعامل معاك علي انك خريج وهيئات تتعامل علي انك طالب يعني مثلا ،

 

المرتب اللي بتاخده ده مش مرتب ، أصلا انت مالكش درجة مالية في الهيكل الادارى المالي للدولة ، هي توصيفها مكافأة ومش بتطلع من وزارة المالية زي موضفي الدولة وبرقابة التنظيم والادارة ، انما بتطلع من وزارة التعليم العالي ، يعني من الاخر اى هذيان من اى حركات مطالبة بحقوق الاطباء ان عاوزين نعلي مرتب الامتياز والجو الحمضان ده ، نفففففففففففض مش هيحصل ومش بيكلموا اصلا فيك الا العاطفة مش اكتر ، ارضي بالقرشين اللي بتاخدهم لانك في الاخر اقرب للطالب ومالكش انتاجية حقيقية ، لو بتدور علي تحسين حقيقي للاوضاع ، يبقي في مجال التعليم وتحسن منظومة محترمة للتدريب والاستفادة من سنة الامتياز مهنيا وفنيا ، انما ماديا دي موالها كبير وهتدخل في متاهة عقيمة من الروتين السخيف .

 

 

 

 

 
تعليقات الزوار
سيب اي كومينت الله يكرمك ,, حلو او وحش مش مشكلة ,, المهم حسسنا ان في بني ادمين بتعدي من هنا :D
اعجبني

HTML 5 شبكة امتيازنا ,, فكرة الموقع ببساطة هي اننا ننور الفترة الضلمة في حياة كل واحد فينا اللي هي فترة الامتياز ,, فجأة بتلاقي نفسك خلصت الكلية وماعدتش عارف تعمل ايه ؟ تنزل فين ؟ ايه الاجراءات وشغل الحكومة دي ؟ تذاكر منين ؟ تنزل من بيتك ولا تأنتخ ؟ وهتفرق ؟ بعد الامتياز في ايه ؟ من الاخر هنا هتلاقي كل حاجه هتحتاجها من اول ما تظهر نتيجة سنة ساته فتابعنا :).