احدث اعمالنا 
موقع الزمالة المصرية و موقع نتائج وزارة الصحة

اهلا وسهلا بكم في شبكة امتيازنا ,, دليلك خلال سنة الامتياز وحتي نهاية التكليف

الشرح

التكليف النائي


محافظات النائي 6 ... " مطروح .. الوادي الجديد .. أسوان ... البحر الأحمر .. جنوب سيناء . شمال سيناء "
اللي تبع التوزيع الإقليمي بتاع الدقهلية .. هي جنوب سيناء .. بس  من حقك تكتب أي حاجة فيهم
الأفضل .. وأكتر مكان الناس بتروحوا .. جنوب سيناء والبحر الاحمر

والاسوأ .. أسوان .. علشان ما بيرضوش يخلوا بسهولة ساعة النيابة أو تعديل التكليف

الشغل هناك متقسم ... ورسمي بقى
15 يوم أو 10 .... وفيه أماكن أقل من كده .. على حسب عدد الموجودين في المكان

مادياً

نفس المرتبات ... بتاعة العادي ... يضاف عليها إن التقييم 600 % .. وفيه بعض الاماكن زي المطارات .. بيدوا حافز مطار ... وبعض الإدارات فيها حاجة اسمها حافز محافظ ... زي البحر الاحمر وتحديداً فيها مرسى علم والشلاتين

أعلى أماكن المرتبات

.. الشلاتين حوالي 4000 .... وبعدها مرسى علم .... وبصفة عامة المطارات وأماكن الحجر الصحي

مديرية جنوب سيناء .. موجودة في الطور
مديرية البحر الاحمر موجودة في الغردقة

السفر

أتوبيس مباشر من المنصورة .. شرق الدلتا أو MCV
وبالنسبة للبحر الاحمر .. فيه أتوبيس للغردقة ..و بتركب من هناك لأي مكان إنت رايحه ... أو تركب من القاهرة .. أتوبيس مباشر بيوصل للشلاتين

وفيه في جنوب سينا مكروباصات بتطلع ...

العيشة

العيشة هناك صعبة مش سهلة .... أغلب الاماكن مفيش فيها مية للشرب ... وهتشتري ...
اللي عاوز يروح نائي.... حاجة من اتنين .. عاوز فلوس .... وعاوز نيابة بسرعة وخاصةً لو مجموعه قليل

قرار النائي مش سهل .... فكروا فيه كويس .. واحسبوا كل الظروف المحيطة بكم صح قبل ما تاخدوه

 

بخصوص التكليف فى المناطق النائية .. لدفعة التكليف الجديد

"من مشاركات د راجح السياجي في جروب التكليف"

اولا : الوزارة بتقسم النائى لمجموعتين
محافظات حدودية ( شمال و جنوب سيناء - مطروح - البحر الاحمر - اسوان - الوادى الجديد ) ..
و مناطق نائية ( سوهاج - قنا - الاقصر - يوسف الصديق بالفيوم - القنطرة شرق بالاسماعيلية - الواحات البحرية بالجيزة - غرب النوبارية بالبحيرة )

المجموعتين دول كلهم لهم
المميزات الادارية المذكورة فى الاعلان اللى هى
1- حقهم فى التقديم من اول حركة نيابات على النيابات الملحة و العادية
2- لهم حق الحصول على الترشيح الوزارى فورا بمجرد ظهور نتيجة النيابات
و ده بيسمحلهم بالتقديم فى الجامعة لتسجيل الماستر من اول سنة
لكن طبعا مش معنى ده ان الجامعة هتقبل التسجيل .. لكن على الاقل فى تخصصات و جامعات سجلوا بالفعل من غير مشاكل

3- عدد السنوات اللازمة للترقية من وظيفة لوظيفة بتبقى اقل لو اخد النيابة كمان فى منطقة نائية
4- التكليف مدته الرسمية عام واحد مش اتنين
5- عند الترقية لأخصائى مبيحتاجش انه يقضى 6 شهور جديدة منطقة نائية ...

نيجى بقى للامتيازات المادية ... اللى هى حافز المناطق النائية ...
للاسف قانون 14 و لائحته التنفيذية بوظوا الدنيا فى الجزء ده و بنحاول نعدلهم بأى شكل ...
لكن الأمر الواقع ان حاليا حافز النائى يشمل المناطق الحدودة ( كلها )
لكن فى المناطق النائية تم استبعاد ( قنا - سوهاج - الاقصر - يوسف الصديق - غرب النوبارية ) من حوافز النائى ...
للأسف حاولنا الناس اللى تكليفها فى المناطق دى الدفعة اللى فاتت تمتنع عن الاستلام لحين ضمها للقانون ..
بس الناس كسلت و حاليا هم المضرورين الاساسيين ...

قيمة حوافز المناطق النائية - الغير عادلة بالمرة - هى الموجودة فى الجدولين اللى في الصور المرفقة مع الموضوع


المرتب فى المناطق النائية عموما بالتقريب 
1700 جنيه + حوافز المناطق النائية على حسب مكانك + النبطشيات ( بحد اقصى 10 سهر و 10 مبيت باجمالى 650 جنيه )
دا للى عاوز الزتونة بتاعت المرتب يعنى (مع مراعاة ان فى استقطاعات بتتخصم مننا حوالى 20% من قيمة الحوافز و النبطشيات )


دا بالنسبة للقواعد القانونية و الصورة العامة للنائى كما يجب ان يكون

ننزل بقى للصورة على ارض الواقع .. بسلبياتها و ايجابياتها ..

ايام الحضور

اولا عدد ايام الحضور .. دى متوقفة على نسبة العجز فى الادارة اللى انت هتروحها و عدد المتواجدين فى الوحدة ..
و ده بيفرق من محافظة لمحافظة بشكل كبير جدا ..
متوسط ايام الحضور فى البحر الاحمر و مطروح مثلا 15 يوم فى الشهر ..
الحضور فى جنوب سيناء متوسط 10 ايام فى الشهر ماعدا ادارة الطور 15 ..
الحضور فى اسوان مثلا ... احم ... ليك 6 ايام اجازة كل شهرين ... الوضع مشابه لكدة فى الوادى الجديد ... و هكذا ..
الفروق كبير فى النقطة دى جدا و بتفرق حتى من ادارة لادارة جوة نفس المحافظة ...

ظروف المعيشة

ثانيا .. لازم تأقلم نفسك انك مش رايح المناطق النضيفة فى المحافظات النائية .. يعنى أسوان السياحة غير اسوان التكليف خااااالص .. و شرم السياحة غير شرم التكليف ... معظم اماكن التكليف النائى محدوفة فى آخر العمار .. و ظروف المواصلات و طبيعة الناس و ظروف الامن و فرص انك تشترى احتياجاتك و كدة مش بسيطة فى اغلب الاحوال .. لازم يبقى عندك روح المغامرة عالية يعنى

السكن

ثالثا .. قانونا انت ليك سكن الوزارة ملزمة توفرهولك و تجهزهولك فى مكان تكليفك .. طبعا مستوى السكن ده بيختلف من مكان لمكان .. لكن على الاقل الحد الادنى متوفر غالبا .. و لما بتشتكى من الجزء ده السكن بيتظبط ...

التغذية
و فى نفس الوقت القانون بيوفرلك تغذية 3 وجبات من اقرب مستشفى لمكان تكليفك .. مسموحلك تاخده جاف و تسويه بمعرفتك .. المشكلة ان غالبا لما بتروح بيحاولوا ينكروا ان القانون بيقول كدة فى الاول عشان فلوس الحاجات دى بتتقلب .. بس بعد شوية خناق بيتصرف فى الاخر .. و الحقيقة برضه انه بيفرق جدا ماديا و الى حد ما بيسد احتياجك يعنى

السفر
رابعا .. طبعا لازم تبقى من هواة السفر .. لأنك عشان تروح نائى هتحس انك ابن بطوطة ... فى اماكن بعيدة .. لا بعيدة بجد مش بعيدة اللى انت تعرفها ..

اعرف اداريات كويس

خامسا .. فى مشكلة ادارية دايما هتقابلها فى المناطق النائية .. ان المناطق دى خارج دولة القانون تقريبا .. هتلاقى مخالفات رهيبة هناك .. و موظفين و مديرين بيستغفلوا الناس و مش ماشيين على نص القوانين اللى موجودة .. و كلهم مربطين مع بعض و عاملين عصابة .. و معظم الدكاترة اللى موجودين من قبلك فى المناطق دى اما جزء من العصابة او مضحوك عليهم بس عاملين نفسهم فاهمين ... فلازم تبقى عارف حقوقك كويس و حاسب طريقة الحفاظ عليها كويس ..

المرتبات

سادسا .. فى محافظات الفلوس منتظمة فيها و محافظات بتستهبل كتير قوى على ما تصرفلك حقك و لازم تحاول تاكله عليك فى البداية ...
اسوأ محافظة فى انتظام المرتبات على الاطلاق هى مطروح .. و اكثرهم استقرارا البحر الاحمر و جنوب سيناء .. و الباقى فى النص .. فى الاخر كل حاجة بتتصرف .. بس بعد ما يطلع عينك

الاخلاء

سابعا .. نقطة من النقاط المهمة جدا فى اختيارك فى النائى .. ان تختار محافظة متقرفكش فى الاخلاء لما تيجى تستلم النيابة .. المحافظات و النقطة دى بتختلف باختلاف نسبة العجز فى المحافظة ... اسوأ محافظة فى الاخلاء على الاطلاق و بلا منافس هى اسوان .. لازم تأخرك لأخر مهلة استلام النيابة ..

البرايفت

ثامنا .. فرص البرايفيت فى النائى .. طبعا جنوب سيناء و البحر الاحمر فيهم ميزة مهمة فى الجزء ده .. ان فى فرص برايفيت سياحة و بترول كويسة فى المحافظتين .. بشوية تظبيط تقدر ترتبها كويس مع ايام حضورك .. فى المناطق التانية البرايفيت فيه حاجتين .. لو مكان الحضور فيه 15 يوم .. فكدة انت عندك فرصة 15 يوم تانيين تنزل برايفيت عادى فى اى مكان زى اى حد ..
لكن لو مكان زى اسوان مفيش اجازات ؟ .. قانونا انت من حقك انك تكشف برايفيت فى وحدتك اللى انت مقيم فيها من بعد مواعيد العمل الرسمية - 2 ظهرا - بشرط انك متصرفش ادوية من صيدلية الوحدة .. الادوية مبتتصرفش غير على التذاكر الرسمية فى مواعيد العمل الرسمية ... و طبعا قيمة الكشف بتلاقى الاهالى نفسهم عارفينها فى المكان اللى انت فيه .. يعنى متوسط زمايلك اللى اقدم منك ... متوسط الكشوفات اللى كنا بنعملها فى اليوم لما تبدأ يبقى ليك اسم فى المنطقة ممكن يوصل لـ 100 جنيه ..
طبعا لما تروح هتتفاجئ ان فى ناس كتير جدا بتبيع الدوا اللى فى الوحدة للناس و تاخد فلوسه فى جيبها و يضربوا تذاكر وهمية ينزلوه عليها و حاجات كتير جدا ممكن تخليك تعمل بالـ 500 و 600 جنيه فى اليوم ... و كله بالحب مع المديرين لأن معظمهم ماشى كدة هو كمان .. و كله فلوس حرام .. و سرقة علنية و مفيش رقيب .. اللى يقبلها على نفسه .. يبقى يطمنى عليه يوم القيامة بقى

البنات اللي عاوزين يروحوا نائي

تاسعا .. نصيحة لكل البنات .. اللى بتفكر فى نائى .. متروحش غير جنوب سيناء و تحديدا الطور .. او فى اسوأ الاحوال تروح مطروح .. غير كدة ... بجد ارجعى بأى تظلم لمكان قريب ..
المكانين دول بس اللى امان لأن البنات متجمعين كلهم فى مركز طبى و لهم سكن خاص بيهم و فى قلب المدينة نفسها ... كل الاماكن التانية بهدلة حقيقية سواء امنيا او اداريا او حتى فى التعامل مع اهالى المناطق دى ..
و لما باقول كلمة امنيا هنا مش بتكلم عن عيان هيشتم ولا حد هيزعق ... لأ امنيا اللى اقصدها دى ممكن تبدأ من الخطف و انتى طالعة لكتر من كدة

النيابات الملحة والترشيح الوزاري في النائي

عاشرا .. انت هتقدم على نيابات من اول حركة نيابات و هتاخد الترشيح الوزارى فورا .. لكن فى نقطتين لازم تفهمهم .. كدة كدة انت هتستلم النيابة فعليا بعد سنة عمل فعلى .. يعنى بالوضع الحالى اللى مقدم ملحة و هو مش نائى من دفعتك هيستلم معاك .. و ممكن قبلك .. فلو عاوز نيابة ملحة عشان تستلم بدرى و ده سبب النائى الوحيد يبقى بلاش احسن .. ( دى نقطة بنحاول نحلها مع الوزارة ان النائى اللى واخد ملح يستلم بعد 6 شهور مش سنة بس لسة متحلتش )
التقديم للدراسات العليا .. انت اه معاك ترشيح وزارى .. يعنى هتقدر تقدم .. لكن ده مش معناه ان الجامعة لازم هتقبل .. فى جامعات كتير فى تخصصات كتير بتشترط استلام النيابة فعليا .. فبرضه شوف التخصص اللى انت عاوزه و اعرف الجامعات اللى هتحضر فيها و افهم شروطها .. عشان لو ده سبب النائى الوحيد و انت مش هتعرف تسجل ماستر .. يبقى بلاش ...
الجامعة مبتفرقش انت نائى ولا لأ ..

الميزة الحقيقة في النائي "بتقدم في حركات اكتر"
الميزة الحقيقية فى موضوع تقديم النيابات .. انك بتقدم على حركات اكتر من زمايلك .. ففرصتك كويسة ان اللى مجالكش الحركة دى تجرب الحركة الجاية من غير ما تبقى اتأخرت ... و كان فى ميزة كويسة ان اتفتحلنا حركة استثنائية بالاماكن المتبقية من حركة نوفمبر .. بعد ما الدفعات الاكبر اعترضت على دخولنا معاهم فى حركة نوفمبر .. ( و الحقيقة ان ده هيحصل تانى بنسبة كبيرة جدا لأن برضه الدفعات الأكبر معترضين على دخولكم معاهم فى نوفمبر لأن كدة المنافسة هتبقى عالية جدا ) .. فى ناس زعلت من الموضوع ده فى الأول .. بس لما اتفتحت اكتشفنا انها كانت ميزة حلوة جدا .. لأن محدش بينافسنا عليها خاااالص ... ففى ناس جالها اماكن كان استحالة مجموعها يجيبها فى الحركات العادية ...

دى اعتقد حدوتة النائى بشكل مبسط يعنى ... و اللى هتقابله لما تروح هناك
______

نقط مهمة عن النائي

شوية معلومات كدة شوفت استفسارات كتير عنها بخصوص النائى :

 

اولا
انت بتستفيد بمميزات النائى سواء كاتبه رغبة اولى او رايحه بسبب مجموعك .. و سواء من اهل البلد او لأ ...
لكن للأسف بقرار الحوافز البشع ده اهل البلد حوافزهم اقل كتيييير و فيهم ناس مبتاخدش حوافز نائى اصلا ( راجع اللينك اللى فوق )

 

ثانيا
لو ليك جيش قبل استلام النيابة ( مرور عام عمل فعلى ) بتروح تعمل حفظ نيابة فى المديرية اللى نيابتك فيها .. و بعدين بتروح الجيش ..
و قدامك اختيارين .. اما انك تقضى 6 شهور فى النائى بعد ما تخلص جيش قبل ما تستلم نيابتك ..
او تستلمها اول ما تخلص جيشك .. و تقضى 6 شهور نائى قب الترقية لمساعد اخصائى ( بعد الماستر )

 

ثالثا
لو تكليفك نائى مش لازم نيابتك تبقى نائى اطلاقا

 

رابعا 
موضوع النقل بعد سنة و درجتك المالية .. الحقيقة ان بقالنا سنتين موضوع الدرجة المالية اتعدل ...
دلوقتى الدرجة المالية مبيتمش تثبيتها غير بعد مرور سنتين من تعيينك فى الوزارة .. يعنى انت هتخلص عام العمل الفعلى فى النائى و درجتك المالية درجة شخصية مش مثبتة فى محافظة تكليفك ..
و بالتالى تقدر تعدل تكليفك بعد عام على اى محافظة تانية و تستلم نيابتك و بعد سنة كمان تتثبت درجتك المالية فى المحافظة الجديدة ...

طبعا دى كانت واحدة من اسوأ الكوابيس اللى فى النائى و اللى طلع عين الدفعات اللى قبلكم اعتصامات و اضرابات عشان تكسبها
و قريب هحاول اجيب القرار الخاص بالنقطة دى و ارفعه


 

نيجي بقي للزتونه بتاع البوست الطويل ده

يعنى انا لو عاوز اختار نائى ارتب المحافظات من الافضل للأسوأ ازاى ؟


بص يا سيدى .. اولا رغبات التكليف بالادارات مش المديريات .. يعنى ممكن تكتب ادارة من محافظة و بعدين ادارة من محافظة تانية .. و هكذا ...
( و حاجة مهمة ان لما حاولوا يغيروا الرغبات و تبقى مديريات فى دفعتنا اضربنا عن التسجيل شهرين تقريبا و عملنا 5 وقفات و اعتصام و موووولد .. لو عملوها معاكم تانى هبقى اقولكم ليه )

طبعا ترتيب المحافظات حسب اولوياتك .. بس يعنى ده الترتيب اللى الاغلب متفق عليه بعد التجربة يعنى :

لو انت بنت
روحى الطور .. و شكرا ..

لو انت ولد بقى :
جنوب سيناء - البحر الاحمر
( اجمالى مميزاتهم و عيوبهم متقاربة جدا من بعض و هم افضل اتنين )

مطروح
الوادى الجديد
اسوان ( هى الاسوأ على الاطلاق )
شمال سيناء ( و لو مشاكلها الامنية خلصت .. تبقى قبل اسوان )
القنطرة شرق - الواحات البحرية ( مفيش معلومات قوى عنهم الحقيقة )

باقى المناطق النائية : لو انت مش فارق معاك الفلوس و عاوز المميزات الادارية بس .

و ملحوظة مهمة :
لو انت ولد .. ابعد عن عاصمة المحافظة دايما هى الأسخف اداريا و الأقل ماديا ... و ان كانت الاكثر امنا و رفاهية .

يعنى .. حاولت اكون غطيت كل النقاط الخاصة بتكليف النائى ... يا رب اكون قدرت .. و لو فى اى استفسار عن اى حاجة فى الموضوع انا موجود

صور ذات صلة
   
تعليقات الزوار
سيب اي كومينت الله يكرمك ,, حلو او وحش مش مشكلة ,, المهم حسسنا ان في بني ادمين بتعدي من هنا :D
اعجبني

HTML 5 شبكة امتيازنا ,, فكرة الموقع ببساطة هي اننا ننور الفترة الضلمة في حياة كل واحد فينا اللي هي فترة الامتياز ,, فجأة بتلاقي نفسك خلصت الكلية وماعدتش عارف تعمل ايه ؟ تنزل فين ؟ ايه الاجراءات وشغل الحكومة دي ؟ تذاكر منين ؟ تنزل من بيتك ولا تأنتخ ؟ وهتفرق ؟ بعد الامتياز في ايه ؟ من الاخر هنا هتلاقي كل حاجه هتحتاجها من اول ما تظهر نتيجة سنة ساته فتابعنا :).