موقع تنسيق وزارة الصحة 
مجموعة ادوات طورناها علشان نقدر نتابع نتائج حركة النيابات والتكليف بطريقة بسيطة ادوات هتخلي الدنيا اسهل كتير عليك ان شاء الله

اهلا وسهلا بكم في شبكة امتيازنا ,, دليلك خلال سنة الامتياز وحتي نهاية التكليف

الشرح

تقسيمة الشغل في الصحة

الشغل في الصحة متقسم على 3 أماكن
وحدات طب الأسرة ... مستشفيات التكامل ... مكاتب الصحة

 

الغالب بيتوزع على وحدات طب الأسرة

مستشفيات التكامل ... هي عبارة عن وحدة بس أكبر حجماً بس ... لمفروض إنها مجهزة بأوضة عمليات .. بس طبعاً مفيش حاجة بتعمل فيها ... وفي الغالب هتلاقوا فيها أخصائيين " باطنة  -- أطفال – نسا ... إلخ " بييجوا في أيام محددة

مكاتب الصحة .. دي في المدن ... ودي شغلها إداري فقط ... تسجيل المواليد والوفيات

 


يفضل وإنت رايح تستلم عند مدير الإدارة ... يكون معاك واسطة :D ... علشان يوزعك في مكان كويس

ابعدوا عن

ابعدوا عن مكاتب الصحة ... ومستشفيات التكامل ... والوحدات القريبة من الإدارة ... والوحدات اللي فيها حد ممارس عام كبير " معدي ال50 سنة " ... علشان هتتقرفوا شغل ونبطشيات وتفتيش

 

نظام الشغل

المفروض الرسمي ... إن الشغل يومياً من 8 – 2 ....
وفيه نبطشية بتتوزع على الطبيب الأول والتاني .... بالتبادل ... من 2 ل 8 تاني يوم الصبح .... أيوة الرسمي إنكم تباتوا في الوحدة ...
بس
طبعاً مفيش حد بيبات إلا فيما ندر .... أغلب الوحدات.... بيخلصوا شغل العيادة .. وبيقعدوا في النبطشية لغاية 4 – 5 ويروحوا

من أول مدير الإدارة ومرورواً بوكيل الوزارة لغاية وزير الصحة .. كله عارف إننا بنقسم الأيما ومفيش حد فينا بيورح كل يوم ....
بس مفيش حاجة رسمية بكده ....
يعني ممكن لو جالك تفيتيش وإنت مش موجود ... يتشطب عليك .... ! حتى لو مدير الإدارة بنفسه قاللك قسم الأيام

الموظفين اللي عندك في الوحدة

الكتبة
التمريض
أطباء الأسنان
الصيادلة
العمال
ومش شرط يكون كلهم عندك ... :D


وإنت لو طبيب أول .. بتبقى مديرهم كلهم
بس إله الوحدة اللي بيمشي كل حاجة في الشغل هو الكاتب الأول
وده أهم فرد في المنظومة الصحية بالكامل ....
لازم تخاف منه .... وتكسبه في صفك .... ممكن يسهلك كل حاجة .. وممكن يلففك حوالين نفسك ....


المفروض كل وحدة فيها مكتب صحة .. يعني بيسجلوا مواليد ووفيات .. بيبقى فيها ختم نسر .... وده مصيبة ... لو إنت مش واثق من الكاتب 100 % ... الختم ده يبقى في جيبك 24 ساعة .... وتسلموه لبعض لو مقسمين الأيام .... وتحافظوا عليه بعنيكم

بالنسبة للإجازات بتاعتك

7 أيام عارضة في السنة ..
15 يوم اعتيادي
بس طبعاً علشان إنت مش بتستلموا من أول يوم في السنة ... فبيصفوا في أول سنة ... على 5 أيام عارضة .. و 11 اعتيادي .. أو جسب تاريخ استلامك
الإجازة العارضة ممكن تتقدم يومها .. أو قبلها أو بعدها
الأجازة الاعتيادي لازم تتقدم قبلها

وحافظوا عليهم .. علشان هتحتاجوهم في الأيام اللي هيتشطب عليكم فيها ..... لأن الأيام دي تحسبوها أجازات .. بدل ما تاخدوا فيها جزاءات وتأثر على ملفك

باقي الاجازات ... هتعرفوها بالتدريج .. ما تشغلوش بالكم بيها الوقتي .. إلا لو فيه حد ياخد أجازة من أول يوم

اللي مسموح لهم يشطب عليك لو كنت غايب

الإدارة ... المديرية .. الوزارة
المجلس المحلي .. المحافظة ...

التشطيب بتتحول بسببه شئون قانونية ...
في الغالب بنعمله أجازات .... لو كان فيه رصيد
لو مفيش أجازات .. بتاخدوا جزاء .. من 3 إلى 5 أيام

أهم حاجة .... الجزاءات مش مجرد فلوس هتتخصم أو هتدفعوها وبس ... الجزاءات هتأثر على تقاريركم السنوية .. اللي على أساسها بتاخدوا الترشيح الوزاري لتسجيل الماجستير .... فخلوا بالكم منها أوي !

 

المرتبات


 المرتب ... 845 تقريباً

متقسم بتاع 350 ألف بند ....
بس المهم فيه ... الاساسي واللي هو 244 جنيه
فيه زيادة في شهر 7 .. علاوة دورية
فيه شوية حاجات كده جنب المرتب هتاخدوها

قرار 60 ... واللي عرفاً معروف باسم التقييم ... وده بيبقى 250 % ... يعني حوالي ... 550
اللي هيبقى طبيب أول .. له حاجة اسمها بدل إدارة ... 108 جنيه
ومكتب صحة .. 40 % ... حوالي 80 جنيه

التقييم رسمياً ... بيبقى للأول والتاني .... وفي مستشفيات التكامل .. بيبقى لأول 6 أطباء
بس علشان الأيام بتتقسم .. فكان بيتقسم ما بيننا بالتساوي 

الجانب الطبي في الموضوع

... ده أسهل جانب وأقلهم أهمية

عندكم عيادة ... وطوارئ واستقبال

هتكشفوا على حالات .... بيختلف عددها من وحدة للتانية ...
عندكم بعض الادوية في الصيدلية برضه بتختلف نوعيتها من إدارة للتانية ...
هتكتبوا اسم الدوا بالعربي .. وبالاسم العلمي ...
مسموح ب 3 أصناف دوا فقط على كل تذكرة ... وبنوع مضاد حيوي واحد فقط !

ولو مفيش صيدلي في الوحدة يا إما توقفوا ممرضة تصرف الدوا ... يا إما هتصرفوه بنفسكم :D

90 % من الحالات أطفال
99 % من الحالات عبارة عن
جلدية
Upper Respiratory Tract Infection .. بتنويعاتها
GE
DM & HTN ... ودول في الغالب بيبقوا جايين يصرفوا علاجهم بس ويمشوا
وال 1 % الباقي إنت وحظك

أدوات الطوارئ

... عندكم خيوط وإبر .... مش أمبولات ... كل حاجة لوحدها ... خيط وهتلضموه في إبره
فيه جهاز Neublizer
أنبوبة أكسجين
بعض أمبولات الطوارئ " Dexa , Adrenaline , Ketofan , Aminophylline , Primperan ….. etc   "


الكشف المنزلي إنتم ومزاجكم ... ما عدا حالات الوفاة .. إجباري لازم تطلعوها
بعد الساعة 2 ... ودياً كده ممكن تشغلوا العيادة Private لحسابكم .. وإنت وضميرك بقى

تعليقات الزوار
سيب اي كومينت الله يكرمك ,, حلو او وحش مش مشكلة ,, المهم حسسنا ان في بني ادمين بتعدي من هنا :D
اعجبني

HTML 5 شبكة امتيازنا ,, فكرة الموقع ببساطة هي اننا ننور الفترة الضلمة في حياة كل واحد فينا اللي هي فترة الامتياز ,, فجأة بتلاقي نفسك خلصت الكلية وماعدتش عارف تعمل ايه ؟ تنزل فين ؟ ايه الاجراءات وشغل الحكومة دي ؟ تذاكر منين ؟ تنزل من بيتك ولا تأنتخ ؟ وهتفرق ؟ بعد الامتياز في ايه ؟ من الاخر هنا هتلاقي كل حاجه هتحتاجها من اول ما تظهر نتيجة سنة ساته فتابعنا :).