احدث اعمالنا 
موقع الزمالة المصرية و موقع نتائج وزارة الصحة

اهلا وسهلا بكم في شبكة امتيازنا ,, دليلك خلال سنة الامتياز وحتي نهاية التكليف

الشرح

 

أولاً ... الأوراق المطلوبة لاستلام التكليف


فيه هيئتين هيتقدم فيهم ورق علشان استلام التكليف ... النقابة العامة ... والوزارة
ترخيص مزاولة المهنة بيطلع من إدارة التراخيص الطبية في الوزارة ... بعد تسجيل عضوية النقابة واستخراج رقم العضوية

الأوراق المطلوبة : 

  • 2 شهادة تخرج
  • 2 شهادة امتياز " هتسلموا 5 شهادات .. والبنات هيستلموا 4 " .... كل واحدة بيبقى مكتوب عليها هي موجهة لفين .. المطلوب هنا .. الموجهة للنقابة العامة .. والموجهة لإدارة التراخيص الطبية
  • فيش وتشبيه موجه للنقابه العامه للاطباء مصر ولن يقبل اى فيش موجهه لاى جهه اخرى
  • موقف من التجنيد ويأتى من منطقه التجنيد التابع لها والمطلوب لاستخراجها ( شهاده التخرج - شهادة الامتياز الموجهه لاداره التجنيد وبطاقه الرقم الثلاثى الخاص بالتجنيد ) ويفضل استخراج 3 نسخ لـــــــ استخراج الكارنيه - اداره التكليف - واحد مع الطبيب
  • 6صور شخصية " مختومة من شئون الأطباء " وممضية من شئون العاملين
  • 2 صور بطاقة ... مختومة .. وممضية من 2 نواب جامعة
  • 2 صور شهادة ميلاد كمبيوتر ... مختومة .... وممضية من 2 نواب جامعة

 

مصاريف ... التسجيل في النقابة حوالي 200 جنيه ... وفيه مصاريف للتسجيل في الوزارة ... يعني اعملوا حسابكم في حوالي 300 جنيه كده.



بعد تسجيل رغبااتكم .... والنتيجة تطلع بإذن الله ... هيطلع لكم نسختين من ترخيص مزاولة المهنة ...  هتروحوا بواحدة فيهم .... وتطلعوا على المديرة اللي توزيعكم جه فيها ... علشان إجراءات الاستلام ... مسموح لمدة 3 شهور بعد ظهور نتيجة التكليف الاستلام في المديرية

الكشف الطبي

قبل ما تستلموا في المديرة .. هتعملوا كشف طبي في مستشفى التأمين الصحي حسب كل مديرية .. هو كشف طبي صوري .. ما بيتعملش فيه حاجة .. المطلوب له بس ... استمارة كشف من التأمين الصحي في المجرز ب" 13 جنيه " وفي دمياط بتتباع في السنانية ....
وهتتصلوا ب الرقم المركزي للتأمين الصحي علشان تحددوا ميعاد الكشف ....
الاستمارة بتتمضي وتتختم الأول من المديرية .. بعدين تروحوا تكشفوا .. يعدها ترجعوا المديرية تكملوا إجراءات الاستلام
تكلفة الكشف الطبية 85 جنيه

ملف الاوراق المطلوبة

فيه جنب كل مديرية مكتبة هتلاقوا فيها ملف فيه الأوراق المطلوبة ..... فيه ناس هيقولوا لكم فيه مكتبات ع الجامعة بتبيع الملف ده .... كل ده فاكس ..... علشان الورق اللي عندهم ناقص .....
هتجيبوا الملف من جنب المديرية ...
ومعاكم باقي الأوراق اللي المديرة بتطلبها ....
" 5 صور شخصية ..... أصل شهادة تخرج .... أصل شهادة امتياز .... أصل شهادة ميلاد كبيموتر ... أصل ترخيص مزاولة المهنة ... فيش وتشبيه موجه للمديرة اللي استلمتم فيها .... استمارة الكشف الطبي .... إقرار الزمة المالية "

بعد ما تستلموا في المديرة ... .لازم في خلال 3 أيام كحد أقصى تكونوا استملتم في الإدارة .... علشان بمجرد الاستلام في المديرية ... اسمك بينزل في كشوف الحضور والانصراف وأي يوم تأخير بيتحسب غياب وتشطيب .



هتاخدوا ورقة من المديرة .. تروحوا بيها ع الإدارة ... مدير الإدارة هيوزعكم على الوحدات ...
هتروحوا الوحدة ومعاكم جواب استلام العمل واستمارة مفردات المرتب .... وتعيشوا بقى :D

الفيش الجنائي

الفيش الجنائي ... بيتعمل في القسم اللي إنت تابع له ...
يعني مثلاً ... في المنصورة .. بتوع قسم أول .. بيعملوه في شرطة المرافق اللي جنب المطافي اللي ورا حي غرب ...
بتوع قسم تاني .. بيعملوه في القسم
الفيش لازم يكون موجه لهئية ما ... ومدته 3 شهور بس وبينتهي .... فما تستعجلوش في عمله إلا لما يتطلب منكم .. اللي منكم يتعمل الوقتي الفيش بتاع النقابة ....
بيطلع تاني يوم مباشرة لو مستعجل .. وبيقعد أسبوع لو عادي
فيه مكان اسمه إدارة الأدلة الجنائية .. في مساكن الشناوي .. ممكن أي حد من الدقهلية يطلعه منه مش شرط يسافر للقسم بتاعه

تعليقات الزوار
سيب اي كومينت الله يكرمك ,, حلو او وحش مش مشكلة ,, المهم حسسنا ان في بني ادمين بتعدي من هنا :D
اعجبني
التنقل

HTML 5 شبكة امتيازنا ,, فكرة الموقع ببساطة هي اننا ننور الفترة الضلمة في حياة كل واحد فينا اللي هي فترة الامتياز ,, فجأة بتلاقي نفسك خلصت الكلية وماعدتش عارف تعمل ايه ؟ تنزل فين ؟ ايه الاجراءات وشغل الحكومة دي ؟ تذاكر منين ؟ تنزل من بيتك ولا تأنتخ ؟ وهتفرق ؟ بعد الامتياز في ايه ؟ من الاخر هنا هتلاقي كل حاجه هتحتاجها من اول ما تظهر نتيجة سنة ساته فتابعنا :).